ف اللحظة دي كل أحلامك الوردية ليوم هادئ أتحطمت بعد ما سمعت كلمة كيلو لبن دي و لقيت الراجل بكل هدوء جبلها لتر لبن و بس كدا خلاص ولا حط الكيس علي الميزان ولا أي حاجة .. المشكلة بما إنك بتحب الفيزياء ف حياتك بتتحول لتحليل لكل جملة وكل فعل بيحصل حوليك بطريقة غير مباشرة ..

ايه اللي حصل هنا لكل الاستغراب دا؟! ما تيجو نشوف

الحدوتة من الأول إن أي حاجة أو بمعني أدق أي مادة بتتكون من حوالي 14 حالة –آه والله 14 أنا مش عايز أنام ومش مجنون زي ما أنت سمعت 14 بس دا مش موضوعنا– خلينا أحنا ف ال 4 حالات اللي على الأرض و ف المحيط بتاعها و بنقدر نتعامل و نشوفهم لأنهم بيتواجدوا ف ظروفنا على الكوكب الجميل المتواضع بتاعنا

ال 4 حالات دول هما ( صلب – سائل – غاز – بلازما ) كل حالة من دول لها خواص ولها ظروف ولها فرح كبير أوي سواء هنتكلم فيزياء أو كميا بس أحنا هنطير حالتين ( غاز – بلازما ) بما إن الحدوتة ف سوبر ماركت ونمسك حالتين ( الصلب – السائل )

لما بنتعامل مع أي مادة سواء صلبة أو سائلة لازم نعرف حاجتين سهلين جداا ( الكتلة والحجم )

وبتعريف بسيط الكتلة هي بالبلدي ” الحاجة دي جواها حاجة منها قد ايه “

نبسطها لك يعني مثلا كيلو فراولة جواه فراولة قد ايه ؟! كيلو فراولة يا عم العبقري

طيب حتة الجبنة النص كيلو جواها جبنة قد ايه؟! كدا نص كيلو جبنه يا عم العبقري برضو طب كيلو من سلطة فواكهة فيها فراولة و موز و كيوي و تفاح بالتساوي جواه قد ايه من كل حاجة؟! هنقول جواه ربع الحاجة دي موز و ربعها فراولة وربعها كيوي و ربعها الأخير تفاح ثالث مرة أهو يا عم العبقري بجاوب عادي

يعني الكتلة هي الحاجة نفسها قد اية ولو قولنها بالتعريف المتعودين عليه من 4 إبتدائي ف هنحسه سهل إنها هي ” مقدار ما يحتوية الجسم من مادة “

لحد هنا الدنيا تمام ..

طيب لو حبينا نعرف ايه هو الحجم ف هنقول ” الحاجة دي اخده حتة قد ايه “، يعني مين حجمه أكبر توكتوك ولا عربية نقل ؟!! الرد الأتوماتيك هيبقي بلاش غباء ما أنت شايف بعينك أهو إن العربية النقل هي الأكبر .. الله ينور الرد دا حلو جدا هو دا بقي الحجم، يعني الحجم بتعريف الكتاب “هو الحيز الذي يشغله الجسم من الفراغ “

لما أنت بقى بتروح تشتري حاجة من أي حد ف أنت بتشتري و تبيع على أساس حاجة من الاثنين دول يا أما الحجم يا أما الكتلة حلو ؟! قول حلو و يلا نكمل ..

عندك مثلا يا سيدي الفاضل لو ربنا كرمك وقررت تكمل نص دينك –ودي نصيحة اخويه لازم تعمل كدا وبدري– هتروح تجيب الشبكة هتلاقي الراجل بيقولك جرام الدهب يا فندم عامل 800 جنية ف العروسة تختار خاتم لذيذ تلاقيه عامل 8000 جنية وأنت تختار واحد شكلة أكبر -علشان تبان إنك جامد جداا ومش بخيل يا نمس ياللي هتطلع محظوظ حالا– بس تلاقيه عامل 6000 جنية ف أنت تقوله أزاي حته البتاع الصغير دا عامل 8000 جنية وأغلي من الكبير، هنا أنت وقعت ف مغالطة لذيذة إنه مش بيبيع لك حجم هو بيبيع لك كتلة جرامات ممكن يكون اللي حجمه كبير فيه فراغات أكتر ف التصميم مخليه عدد جرامات أقل

على عكس مثلا لو روحت تشتري إزازة بيبسي، هتلاقيك بتقول للراجل عايز إزازة بيبيسي ايه ؟ أيوة ها سمعني ؟! .. أيووووة يا أبو كرش 2 لتر .. هنا أنت قولت له عايز حجم بيببسي مقداره 2 لتر .. ف اللحظه دي أنت بتشتري حجم مش كتلة.

يبقي كدا عندنا حالتين بيتم بيهم عملية البيع الشائعة ف حياتنا اليومية هما الكتلة والحجم

لو وصلت لحد هنا وفهمت كل كلمة ف أنت مبروك عرفت ليه ف الأول أنا استغربت لما سمعت كلمة كيلو لبن ..

.

.

.

بالظبط الفكرة إن أي مادة صلبة بنتعامل معاها ف التعامل اليومي ف البيع و الشرا بنتعامل بالكتلة على عكس السوائل اللي بنتعامل معاها ف البيع و الشرا بالحجم، ف كان المفروض نقول هات لتر لبن مش كيلو لبن و نقول عايز لتر صابون سائل مش كيلو صابون سائل، ف كدا زي أنك مينفعش تروح لبتاع الطماطم تقوله عايز لتر طماطم مينفعش تروح تقول لبتاع السوبر ماركت عايز كيلو لبن

ركز الفيزياء بالمرصاد ف كل خطوة هتعملها، أنا براقبك وهراقبك